شروط الاستخدام

1 · شو هي الخدمة

BOS برنامج لإدارة الشؤون المالية للمباني والمجمّعات. بيقدّم منتجين: خدماتي لإدارة صندوق العمارة، وإيجاراتي لإدارة عقود الإيجار. بتستخدمه من المتصفح على التلفون أو الكمبيوتر.

2 · حسابك ومسؤوليتك عنه

• لازم تعطينا معلومات صحيحة عند التسجيل.
• إنت مسؤول عن سرية كلمة مرورك وعن كل نشاط بيصير من حسابك.
• لو شكّيت إنه حدا دخل على حسابك، بلّغنا فورًا وغيّر كلمة المرور.
• لما تضيف أعضاء لمجمّعك، إنت مسؤول عن اختيارهم وعن صلاحياتهم.

3 · بياناتك ملك لك

كل بيانات مجمّعك ملك لك، مش لنا. بنستخدمها بس لتشغيل الخدمة إلك. ما بنبيعها، وما بنشاركها مع معلنين، وما بندرّب عليها نماذج ذكاء اصطناعي.

تقدر تصدّر بياناتك كاملة بأي لحظة من داخل البرنامج، بلا ما تسألنا وبلا رسوم.

4 · حدود مسؤوليتنا — اقرأها منيح

• راجع أرقامك قبل ما تعتمدها بقرار أو باجتماع لجنة.
• ما بنتحمّل مسؤولية خسائر ناتجة عن بيانات مُدخلة غلط أو قرارات اتخذتها بناءً على تقارير البرنامج.
• ما بنقدّم استشارات ضريبية ولا قانونية. لو محتاج، ارجع لمختص.
• الخدمة بتنقدّم «كما هي». بنشتغل على استقرارها بجد، بس ما بنقدر نضمن إنها ما بتتعطّل ولا مرة.

5 · التوفّر والأعطال

بنراقب الخدمة على مدار الساعة وبنسعى تضل شغّالة. ممكن نوقفها مؤقتًا للصيانة، وبنحاول نبلّغ قبل بوقت كافي. الأعطال المفاجئة بنصلحها بأسرع وقت ممكن.

وبنقولها بصراحة: بنعمل نسخة احتياطية يومية، بس بنصحك تنزّل نسخة على جهازك بشكل دوري من زر التصدير. الاحتياط مسؤولية مشتركة.

6 · الاشتراك والدفع

• الخدمة بتبلّش بفترة تجربة مجانية.
• بعد التجربة، بينحدّد الاشتراك حسب حجم مجمّعك، وبتتبلّغ بالسعر قبل ما تلتزم فيه.
• الدفع بتفاصيله بتنتفق عليها معنا مباشرة.
• لو ما تجدّد، بينوقف الوصول للبرنامج — بس بياناتك بتضل محفوظة 90 يوم تقدر خلالها تصدّرها أو ترجع.
• أي تغيير بالسعر بينبلّغ قبل 30 يوم على الأقل.

7 · الاستخدام المقبول

ممنوع تستخدم الخدمة لـ:

• أي نشاط مخالف للقانون أو للاحتيال على أشخاص.
• محاولة الوصول لبيانات عملاء تانيين أو اختبار اختراق النظام بلا إذن كتابي منّا.
• إعادة بيع الخدمة أو تأجيرها لطرف تالت بلا اتفاق.
• إرهاق النظام بطلبات آلية مفرطة.

لو صار خرق واضح لهالبنود، بنقدر نوقف الحساب — وبنبلّغك بالسبب.

8 · بيانات أشخاص تانيين

لما تدخّل أسماء وتلفونات سكان أو مستأجرين، إنت اللي مسؤول عن قانونية جمعها واستخدامها، وعن إبلاغهم إذا لزم. إحنا بنوفّرلك أدوات الحماية، بس القرار إلك.

9 · إنهاء الخدمة

تقدر توقف استخدام الخدمة بأي وقت. وقبل ما توقف، صدّر بياناتك. وإذا احتجنا إحنا نوقف الخدمة كليًا لأي سبب، بنبلّغك قبل 90 يوم على الأقل وبنعطيك وقت كافي تصدّر كل إشي.

10 · القانون المطبّق

هالشروط بتخضع للقوانين المعمول فيها بفلسطين، وأي نزاع بينحل ودّيًا أولًا، وإن تعذّر فأمام الجهات المختصة.

11 · تواصل

واتساب: +970 59 777 1477 · بريد: info@bosbuilding.com